Fræðsluferð til Prag!

Prag er ein fegursta borg Evrópu með aldagamla sögu og stórfenglegan arkitektúr og einn besta bjór í heimi. Sannkölluð menningarborg sem býður upp á iðandi mannlíf og einstaka upplifun listaverka, glæsilegra bygginga og vel varðveittra sögulegra hverfa.    

Við bjóðum upp á margar fræðandi kynnisferðir um borgina og merka staði og erum alltaf tilbúin til að skipuleggja skemmtilega viðbótardagskrá og kynnisferðir eftir séróskum hvers hóps.

Perlan við Moldá

Prag er miðstöð tékkneskrar menningar og sögu. Miðborgin er einstök upplifun með fjölda vel varðveittra miðaldarstræta og fallegra bygginga sem rekja evrópska listasögu frá gotneskum stíl til módernismans. Prag jafnast fyllilega á við stórborgirnar Róm, París og London enda flykkjast ferðamenn þangað frá öllum heimshlutum til þess að upplifa perluna við Moldá.

Menningarborg Evrópu

Söguleg hverfi Prag hafa varðveist vel enda er öll gamla miðborgin á heimsminjaskrá Unesco. Auðvelt er að ferðast um borgina þar sem áhugaverðustu staðir og hverfi borgarinnar eru öll í göngufjarlægð hvert við annað. Ómissandi er að ganga með mannfjöldanum yfir Karlsbrúna og rölta upp á kastalahæðina og njóta stórfengleika Vítusarkirkjunnar. Við hinn enda Karlsbrúarinnar býður Mala Strana hverfið upp á sögufrægar hallir, kirkjur og fallega garða. Gamla bæjartorg Prag er iðandi af mannlífi umkringt gullfallegum byggingum og fjölbreyttum arkitektúr. Miðstöð verslunar og skemmtanalífs í borginni er við Wenceslas torgið og í Prag er gamalt og sögufrægt gyðingahverfi með elstu starfandi sýnagógu í Evrópu.

Draumur listunnandans

Sögufrægur og fallegur arkitektúr er allsráðandi í Prag og bæheimski listheimurinn býður listunnendum upp á fjölda áhugaverðra safna og listaverka. Allt frá gotnesku altarsverkum Agnesarklaustursins til módernísku listaverka súrrealista og kúbista í Veletržní Palác. Prag er samsuða listrænnar tjáningar sem er órjúfanlegur hluti borgarinnar.

Einstök bjórmenning

Síðan Pilsner Urquell var fyrst bruggaður árið 1842 þá hafa Tékkar verið þekktir fyrir að brugga heimsins bestu bjóra. Lítil brugghús og bjórgarðar hafa sprottið upp um borgina haldið þróun tékknesku risanna, Urqell, Budvar og Starapramen áfram í að þróa einstakar og fjölbreyttar tegundir við allra hæfi.