Andorra

Andorra er heillandi smáríki staðsett í Pýreneafjöllum, milli Frakklands og Spánar. Að flatarmáli er það um 480 ferkílómetrar og þar búa um 78 þúsund manns. Ef við setjum það í kunnuglegt samhengi þá er stærð landsins á við Reykjavík, Kópavog og Garðabæ til samans, og hægt er að ganga hringinn í kringum það  á 5 dögum.

Þótt íbúatala Andorra sé ekki há er alltaf mikið um að vera í þessu sjarmerandi fjallalandi. Þangað koma árlega um þrjár og hálf milljón ferðamanna og dvelja til lengri eða skemmri tíma, fyrir utan fjölda gesta frá nágrannaríkjunum Frakklandi og Spáni, en þaðan koma á hverju ári um 5 milljónir manns í styttri dagsferðir. Ferðaiðnaðurinn er allra stærsta tekjulind þjóðarinnar og hann einkennist í öllu af mikilli fagmennsku og gæðum. Andorra býður upp á stórkostlega aðstöðu til fjölbreyttrar skíðaiðkunar yfir vetrartímann, og á sumrin flykkist fólk þangað í hvers kyns gönguferðir og náttúruskoðun, enda umhverfið og útsýnið æði tilkomumikið og magnað.

Grandvalira skíðasvæðið

Frá Spáni er fyrst komið til höfuðborgarinnar, Andorra de Vella, í rétt rúmlega 1.000 metra hæð og brunað áfram inn dal sem teygir sig alla leið að landamærum Frakklands. Við tekur nokkur hækkun á 8 km leið, yfir til Encamp sem liggur í 1.250 metra hæð. Þaðan liggur Funicamp kláflyftan upp á skíðasvæðið. Ekki er hægt að renna sér alla leið til baka og er þá kláfurinn tekinn niður í bæ.

Frá Encamp liggur svo leiðin til Canillo sem er rúma fimm kílómetra í burtu og þangað er umtalsverð hækkun, eða upp í 1.525 metra. Kláflyfta gengur úr þorpinu og upp á skíðasvæðið. Hægt er að renna sér niður í bæinn. 10 kílómetrum frá Canillo er smáþorpið El Tarter í 1.750 metra hæð. Þar eru bæði afkastamikil kláfferja og stólalyfta, að ógleymdum aðal Aprés Ski barnum Aberset, en þar er dansað á útipalli langt fram á kvöld, boðið upp á flöskuborð, útibari, og mat.

Þremur kílómetrum ofar í dalnum er svo heimavöllur Tripical, Soldeu, sem stendur í 1.800 metra hæð. Hér er fjöldi hótela, skemmtilegir barir, og veitingastaðir af öllum stærðum og gerðum. Auk þess er boðið upp á kláflyftu sem ferjar fólk upp á skíðasvæðið. Þetta er fallegt þorp, sem fékk umtalsverða andlitslyftingu sumarið 2019, en heil umferð heimsbikarmótsins í skíðaíþróttum fór fram í Soldeu þá um veturinn. Nýlega var svo tilkynnt að lokaumferðin, sjálf úrslit heimsbikarmótsins, fari þar fram 2023. Þetta sýnir og sannar hversu góðan stað við bjóðum hér upp á!

Eins og áður segir, er úrvalið hér af veitingastöðum mikið – þú finnur stað með hinni þekktu gæðastjörnu Michelin, auk yndislegra pizzastaða, skemmtileg kaffihús og bari, en mörg hótelana eru opin fyrir almenna gesti á veitingastaðina sína.

Efst í dalnum, sex kílómetrum ofar, í 2.120 metrum er svo Rauða hlíð eða Grau Roig. Þar er bara eitt hótel og nokkrir veitingastaðir, en margar lyftur eru í dalnum, sem þjóna tengihlutverki fram og til baka yfir í síðasta bæinn sem myndar Grandvalira svæðið. Hér eiga til að myndast 5 mínútna raðir í tvær lyftur yfir háannatímann, þegar fólk er að færa sig milli svæða.

Alveg við landamæri Frakklands er svo Pas De La Casa, eða Skrefið heim. Þetta er nokkuð stór bær í 2.100 metra hæð,  með mikið gistirými, fjölda lyfta og gott úrval af verslunum. Hér er að finna ódýrustu gistinguna og ekki óalgengt að þarna séu stórir hópar af ungu fólki sem leigja íbúðir, drekka mest heima og skemmta sér langt inn í nóttina. Þarna er því næturlífið oft líflegt og mikið fjör fram undir morgun. Pas De La Casa liggur alveg á landamærunum og mikill ys og þys sem fylgir umferðinni í útjaðri bæjarins.

Skíðasvæðið

Grandvalira skíðapassinn veitir aðgang að samtals 210 kílómetrum af samtengdum vel merktum brekkum af ýmsu tagi, en litakerfi er notað til aðgreiningar. Grænar brekkur eru fyrir algjöra byrjendur. Bláar brekkur eru auðveldar, þær rauðu meiri áskorun og þær svörtu mest krefjandi. Á þeim svæðum sem gestir hafa aðgang að er skiptingin þannig að rúmlega 10% eru byrjendabrautir, tæplega 40% (88 km) eru bláar brautir sem eru auðveldar, rauðar brautir eru rúmlega 20% (42 km) og hæfa lengra komnum en eru færar flestum. Svartar brautir eru samtals 17 km og eru eingöngu ætlaðar þaulvönum. 71 lyfta sér um að flytja gesti hratt og örugglega á áfangastað. Samanlögð flutningsgeta er 111.478 manns á hverri klukkustund. Allar lyftur eru nýjar eða nýlegar og hannaðar með öryggi og þægindi að leiðarljósi. Ef það myndast raðir er biðin aldrei lengri en 5 mínútur. Á þetta nánast eingöngu við lyftur sem flytja fólk milli svæða. Raðir eru þó ekki í neinni líkingu við það sem fólk þekkir á Íslandi.

Mjög auðvelt er að átta sig á svæðinu og merkingar eru mjög góðar. Ef einhver villist er bara í uppsiglingu frábært ævintýri því mjög vel er gætt að gestum og allar brekkur enda jú bara við einhverja lyftuna sem flytur fólk upp á ný þar sem það kemst aftur á leið. Í flestum tilfellum eru tvær eða fleiri mis krefjandi leiðir niður.

Á tveim þriðju hlutum svæðisins eru snjóalög tryggð með framleiddum gæðasnjó alveg frá því seint í nóvember. Við það bætist svo náttúruleg ofankoma. Það er því alltaf hægt að skíða. Meðalfjöldi sólardaga á ári í Andorra er 300.

Þegar komið er upp úr þorpunum blasir við víðernið, sólbakaðar brekkur og heiður himinn. Yfirþyrmandi fegurð sem auðveldlega grætir. Þægilegir kláfarnir Funicamp, Canillo, El Tarter og Soldeu, ásamt nokkrum stólalyftum flytja fólk úr þorpunum en þeir byrja að ganga kl. 8:30 á morgnanna. Þaðan er svo hægt að þræða sig um vel merktar brautir við allra hæfi. Í brekkunum er fjöldi veitingastaða þar sem tilvalið að fá sér saman hressingu eða heila máltíð. Skipulögð ferð gestgjafa um svæðið hjálpar fólki að átta sig.

Svæðin upp af hverju þorpi fyrir sig og svo toppsvæðið þar fyrir ofan bjóða endalausa möguleika hvort sem fólk vill ferðast milli tinda og dala eða bara halda sig við sína uppáhalds brekku. Af öllum tindum eru í boði mismunandi erfiðar brekkur. Fjöldi veitingastaða er í fjallinu og þeir sem renna sér fá fljótt á tilfinninguna að vel sé hugsað út í þægindi og auðvelt aðgengi þannig að úr verði hæfileg blanda af skemmtun og hreyfingu.

Gestgjafar bjóða upp á kynningarferðir þar sem farið er yfir allt svæðið. Tilvalið til að kynnast staðháttum, læra grunnleiðir og fá góða tilfinningu fyrir hlutunum.

Fjallaskíðafólk hefur skinnað upp á ýmsum stöðum en traustir aðilar bjóða ferðir og námskeið fyrir þá sem hafa nú þegar fengið fjallaskíðabakteríuna eða vilja prófa. Nokkuð er um ótroðnar brautir og mikið um utanbrautaskíðamennsku á svæðinu.

Norðurdalur, Vallnord Es Mes er annað skíðasvæði sem er þekkt fyrir ótroðnar brautir. Þar eru rétt um 63 kílómetrar af brautum, 31 lyfta og 42 brautir. Það tekur 45 mínútur að keyra þangað yfir og þar er sér lyftukort. Pal Arinsal er einnig áhugavert svæði, bæði á veturnar og ekki síður á sumrin þegar allt snýst um fjallahjólreiðar, bæði brun og enduro.

Dagskrá - kann að breytast

• add Föstudagur – Frá Barcelona til Andorra

  Í Keflavík

  Mælt er með að farþegar innriti sig tveim og hálfum til þrem tímum fyrir brottför. Brottför er kl. 15:25 en þá er lítil umferð um flugvöllinn. Vegna bretta-og skíðabúnaðar tekur innritun lengri tíma en venjulega. Á skjá í brottfararsal eru upplýsingar um hvaða innritunarborð er í notkun. Leitið að nafni áfangastaðar (BARCELONA) og númeri innritunarborðs. Flogið er með Vueling. Haldið þangað með allan farangur.

  Við innritun þarf að framvísa vegabréfi. Settir eru töskumiðar á farangur, bæði töskur og búnað. Þegar tekið hefur verið á móti farangri við innritunarborð þarf að fara með búnaðinn þangað sem farangur í yfirstærð er afhentur, innst í innritunarsal Icelandair, út við framhlið hans. Óskið aðstoðar ef þið lendið í vandræðum. Þegar búið er að afhenda búnað er haldið upp í vegabréfaskoðun og vopnaleit á efri hæð.

  Í Barcelona

  Vueling er þjónustað í Terminal 1 á El Prat alþjóðaflugvellinum í Barcelona og reiknað er með að lenda um klukkan 20:50. Veður og aðrar aðstæður gætu haft áhrif á endanlegan komutíma. Stutt er að fara í gegnum snyrtilega flugstöðina eftir að allur farangur hefur skilað sér. Allur búnaður kemur á sérstöku færibandi innst í komusal. Þegar allt er komið ganga gestir fram í móttökusalinn þar sem gestgjafar bíða og leiðbeina um staðsetningu rútnanna sem flytja alla í fjöllin. Það er ekki úr vegi að nota salerni, kaupa sér vatn eða aðrar veigar og einhvern bita að maula á leiðinni. Reikna má með að hitinn í borginni sé rétt um 12-14 gráður.

  Um Katalóníu

  Ekið er eftir hraðbraut fyrsta hlutann í suðurhluta Barcelona. Það er pínu fyndið að hefja skíðaferð með því að aka milli pálmatrjáa í þægilegum sumarhita. Ekið er sem leið liggur í norður um grösugar og skógi vaxnar sveitir Katalóníu þar sem sagan drýpur af hverju strái. Vegir eru mjög góðir og víða er farið hratt yfir. Fljótlega lækkar þó hámarkshraðinn, leiðin liggur meira upp en niður og þrætt er í gegnum litil krúttleg sveitaþorp. Um miðbik leiðarinnar er tæknistopp á heppilegum stað.

  Til að spara gestum sporin eru lyftukort seld og afhent í rútinni á leiðinni. Hægt er að greiða með reiðufé eða greiðslukorti. Það er um að gera að fá sér aðeins í rútunni og ekki ólíklegt að einhver skemmtileg lög verði aðeins látin hljóma. Rétt er að benda á náttúrulögmálið um það hvernig bjór og vín skilar sér aftur í svipuðu magni á skömmum tíma.

  Andorra de Vella og Soldeu

  Þegar komið er að landamærum Spánar og Andorra er ekið í gegnum stjórnstöð en ekki þarf að framvísa neinum skilríkjum eða vegabréfi en annað hvort þarf að vera til taks. Fljótlega er svo komið að höfuðborginni þeirra, Andorra De Vella. Þetta er fallegur bær í þröngum dal þar sem er að finna góð veitingahús, fínar verslanir og alla almenna þjónustu. Þar er einnig Caldera, stærsta heitavatnsheilsulind Evrópu.

  Keyrt er í gegnum borgina, áfram í gegnum þorpin Encamp, Canillo, El Tarter og til Soldeu sem þó er bara í rétt um 19 km fjarlægð frá höfuðborginni. Á leiðinni sjást fyrstu lyftumannvirkin, kláfarnir sem ferja fólk upp á svæðið úr bæjunum.

  Þegar komið er til Soldeu er öllum ekið á sitt hótel. Þau eru þó öll í mínútu fjarlægð eða styttra frá hvert öðru en þorpið er ekki stórt.

• add Laugardagur – Velkomin til Andorra

  Hægt að taka kennslu um morguninn

  Yfirlitsferð klukkan 10:00 – Hægferð og hraðferð

  Soldeu – Canillo – Soldeu – Grau Roig – Pas De La Casa (hádegisverður) – Grau Roig – Soldeu – Tarter – Aprés Ski

  Gestgjafar skipta hópnum eftir getu og fara mishratt yfir svæðið. Farið verður á alla staði en brekkurnar sem eru valdar eru hæfi þátttakenda. Hraðferðin nær einnig fleiri ferðum í ákveðnum brautum.

  Báðum ferðum lýkur á sama Aprés Ski barnum þar sem hópurinn fagnar frækilegri yfirferð, ræðir málin og lætur þreytuna líða úr skrokknum við eðal tóna og töfrandi drykki. Hér má reikna með að slegið verði met í skíðaskódansi utanhúss með frjálsri aðferð og fötunum kann að fækka aðeins, Aperolið sogið úr lítersglösum og skotin framreidd á meterslöngum trésbrettum.

• add Sunnudagur – Andorra á eigin spýtur

  Frelsið er Yndislegt

  Þetta er frjáls dagur og um að gera að glíma við kortið af svæðinu, smíða skemmtilega áæltun til að fylgja og bara upplifa frelsið. Þeir sem hafa áhuga geta fengið að prófa fjallaskíði.

• add Mánudagur - Pas De La Casa

  Pas De La Casa og Kjöt

  Hægt er að bóka sig í hálfsdagsferð yfir í Pas De La Casa svæðið. 

  Mæting 09:00 á toppi Soldeu kláfsins. Rennt rakleiðis yfir og allar brekkur prófaðar. Þeir sem treysta sér taka svartar brautir með fararstjóra. Morgunhressing í bænum og nokkur góð rennsli tekin áður en haldið er aftur yfir í Grau Roig og tekinn vel útilátinn hádegisverður á Lacc Dels Pessons sem er að finna í uppgerðum útihúsum við lítið vatn í faðmi fjallanna. Þarna er óviðjafnanlegt útsýni, frábær matur og ef veðrið leikur við hópinn er mikilfenglegt að sitja úti í sólinni á meðan borðað er. Þar með lýkur skipulagðri dagskrá en ef að líkum lætur mun einhver kjarni halda áfram, aðrir renna sér, fara snemma í spa eða rúlla niður í Andorra De Vella í verslunarleiðangur.

• add Þriðjudagur - Andorra eftir þínu höfði

  Á vit ævintýra

  Eftir nokkurra daga dvöl í Andorra eru flestir orðnir vel áttaðir, þekkja helstu kennileiti og farnir að eignast svolítið í þessu einstaka svæði. Þessi dagur er frjáls og flestir bara spretta af stað með ákveðna áætlun í huga. Hægt er að fá kynningu á fjallaskíðamennsku í fylgd með leiðsögumönnum.

  Gestgjafar láta vita af sér í fjallinu ef gestir hafa áhuga á að hittast eða vanhagar um eitthvað. Til dæmis á toppi Soldeu kláfsins þar sem er ágætt veitingahús, en einnig er vinsælt að renna sér niður í bæinn eða jafnvel gera sér ferð niður að Canillo kláfnum og taka hann niður í bæinn.

  Í lok dags hópast allir á L’Abersat Aprés Ski barinn í El Tarter. Það er aldrei að vita nema að eitt og eitt kunnuglegt íslenskt dægurlag hljómi í eyrum.

  Gert er ráð fyrir að fólk fara á eigin forsendum í kvöldverð og þeir allra hörðustu haldi áfram á einhverjum af bestu öldurhúsum bæjarins. Bent er á að víða er hægt að geyma skíði og bretti í læstum skápum. Er þá gott að taka mynd af staðnum og númeri skápsins.

• add Miðvikudagur – Eftirlæti gestgjafanna

  Gert vel við sig í brekkum og bæ

  Gestgjafarnir skipta upp hópnum í tvennt eftir getu. Annar hópurinn fer á hraðferð með einu morgunstoppi og hádegishléi yfir uppáhaldsbrautir annars gestgjafans. Hinn fer á hægferð með einu morgunstoppi og hádegishléi á vel valda staði með hinum gestgjafanum. Hóparnir hittast svo á fordrykk á barnum á Hermitage hótelinu. Kvöldmaturinn verður svo á öðrum hvorum veitingastað hótelsins en það fer eftir þátttöku hvor staðurinn verður fyrir valinu. Annar þeirra ber Michelin stjörnu og hinn er meira afslappaður en hefur fengið meðmæli Michelin. Í kjölfarið verður svo dansað og líklega taka sig upp gamlir taktar í hópnum og deginum ljósara að þetta er jú allt í mjöðmunum.

• add Fimmtudagur – Brunað í brekkum

  Brunað í brekkum

  Vikan er ótrúlega fljót að líða við svona aðstæður. Upplifun gesta leggst inn í reynslubankann, minningarnar hlaðast upp og munu draga fram bros og ljúfar tilfinningar við ólíkustu aðstæður um ókomna tíð.

  Síðasta daginn er um að gera að taka fjallið föstum tökum, renna aftur í þína uppáhaldsbrekku, stoppa á skemmtilegustu stöðunum og njóta til hins ýtrasta.

  Líklega, ef þú ert eins og við hin, hefur þegar hér er komið við sögu myndað sterka tengingu við Andorra, Grandelvira skíðasvæðið og þessa skemmtilegu tegund af ferðamennsku. Það er ekki ólíklegt að söknuðurinn grípi þig og umræðan um næstu ferð verður ansi hávær á loka metrunum.

• add Föstudagur - Sumir heim og aðrir ekki

  Í Soldeu

  Um morguninn er þeim gestum sem eru viku á skíðum eða ætla að taka nokkra daga í Barcelona safnað á hótelum eftir ákveðinni áætlun sem gestgjafar kynna með fyrirvara. Sumir skilja eftir þjórfé fyrir þernur og starfsfólk á hótelinu.

  Litla þorpið þakkar fyrir samveruna og fleistir sérstaka tilfinningu sem er skrýtin blanda af söknuði og jákvæðum minningabrotum sem munu lifa lengi, í það minnsta þar til fólk kemur aftur.

  Á leiðinni til baka er komið við á hentugum stað fyrir stutt tæknistopp, hægt að grípa veitingar og svo áleiðis til Barcelona.

  Innritun er á Terminal 1 á El Prat og sem áður er það Vueling sem flogið er með. Það er nokkuð lipurt að fara með búnaðinn á sinn stað eftir innritun. Þá er haldið í vopnaleit og inn á biðsvæðið þar sem eru nokkrir veitingastaðir og ágæt fríhöfn.

  Í Keflavík

  Farangur og búnaður er sóttur eins og venjulega í Keflavík. Farangurinn kemur á færibandi eins og fólk þekkir en búnaðurinn kemur á sama stað og annar óreglulegur farangur. Yfirleitt er ekki mikil bið eftir afhendingu.

  Tripical, gestgjafar og Andorra þakka fyrir samveruna.