Aðventuferð til Helsinki og Tallinn 🎄

Dagsetning ferðar:  3. -7. des 2021

Hyvää joulua! 

Svona segja Finnar gleðileg jól (borið fram: huva jólúa). Og þeir kunna sannarlega að halda jól, og ekki síður gleðilega aðventu.  Við heimsækjum jólamarkaði með glæsilegri hönnun og huggulegheitum.  Yljum okkur á glöggi og tökum slökun í ekta saunu. Finnarnir kunna þetta! 

Hvíta drottningin er leyndur fjársjóður

Helsinki er stundum kölluð Hvíta drottning Eystrasaltsins. Borgin er hreint út sagt töfrandi í desember, þegar hún skrýðist jólaljósum, skautasvellið við járnbrautarstöðina opnar og Stockmann vöruhúsið dregur tjöldin frá jólaglugganum. Finnsk matargerð er mörgum hulin ráðgáta, hún mun koma bragðlaukunum dásamlega á óvart, og fjölmargir jólamarkaðir með finnsku handverki færa þér jólaskapið á vel pökkuðu jólasilfurfati.

Marimekko, iittala, Artek og svo miklu, miklu meira

Þó að hönnun Marimekko, iittala og annarra stórra nafna dragi vagninn þá eru þessi merki bara brot af því besta. Finnar eiga fjölmarga minna þekkta hönnuði og handverksfólk á heimsmælikvarða, sem bjóða upp á sínar gullfallegu vörur  á hinum margvíslegu jólamörkuðum Helsinkiborgar.

Heimsókn til Tallinn

Eftir hrun Sovétríkjanna fóru Finnar í stórum stíl að sækja Tallinn heim og hinn vestræni heimur kynntist smám saman miðaldaborginni Tallinn. Fyrir utan augljóst aðdráttarafl hinnar gömlu borgar þar sem sagan svífur yfir vötnum hefur Tallinnarbúum tekist að markaðssetja borgina sem heilsulindarborg með menningu, veitingastaði og öldurhús í einum hnapp. Gamli miðbærinn í Tallinn er svo vinsæll að í útjaðri hans hafa hverfin Kalamaja, Telliskivi og Noblessner öðlast nýtt líf, sum part í gömlum sovésku verksmiðjuhúsnæðum en einnig í gömlum hverfum sem höfðumátt muna sinn fífil fegurri. Í þessi hverfi leita nú Eistlendingar þegar þeir vilja hvíla sig á skarkala miðborgarinnar, fara út að borða, sitja á kaffi- og ölstofum, kaupa eistneskt handverk og hönnun og njóta lífsins.

Þessi best varðveitta miðaldaborg í Norður-Evrópu og yngri úthverfi hennar láta engan ósnortinn og má með sanni segja að þær systur, Helsinki og Tallinn bæta hvor aðra upp.

Vellíðan, slökun og gleði korter fyrir jól

Komdu með í aðventuferð til Helsinki og kúplaðu þig út úr íslenska asanum. Heilsaðu upp á okkar stórskemmtilegu frændþjóð og drekktu í þig finnska menningu undir fögrum desemberhimni, í afslöppun og rólegheitum. Ef þú vilt stuð er tilvalið að heimsækja góðan karaókí bar, sveifla alvöru- eða ímynduðum lokkum um leið og þú þenur raddböndin í Þetta er nóg úr kvikmyndinni Frozen. Almenningssaunur borgarinnar eru svo alveg málið fyrir fullkomna slökun á líkama og sál. Eftir saunuheimsókn mælum við með kyrrð og ró í klettakirkjunni Temppeliaukion kirkko. Endurnærandi aðventuveisla! 

Radisson Blu Alexanderi Hotel, Helsinki 4-stjörnu hotel 

Hótelið er á æðislegum stað stutt frá jólastemningunni. Ekta finnskt andrúmsloft, og auðvitað er sauna á hótelinu sem svíkur engan.

Girnilegt morgunverðarhlaðborð kemur deginum af stað. Að degi loknum er stemningin á hótelinu svo kósí að gestirnir sofna með bros á vör.
Ekta skandinavísk umgjörð og stutt á marga flotta veitingastaði.

Skoðið heimasíðu hótelsins hérna